威華達（622）唔只係最平嘅電力股，仲有件會生金蛋嘅聯營，增值獲利條件充份，未有耐到價。威華達聯營港華燃氣（1083），以集團所佔港華27%權益，等額市值9.6億銀，威華達本身市值得6.2億銀，反映出威華達本身好殘。又聯營港華上星期五爆升15%，主要原因係，港華話計劃出售石油氣業務，兼專注發展城市管道天然氣分銷業務。市場解讀係，祖國市場天然氣業務發展空間龐大，港華呢次出到聲話考慮出售非核心項目，加埋港華有大股東煤氣（003）做後盾，認真發力搵銀，前景自然睇高一線。而威華達中長線嚟自港華嘅盈利及資產增值貢獻，一樣肥仔。威華達最新NAV0.81元，現價（0.13元）折讓高達84%，係電力股當中最平選擇。係咁意以0.3倍P/B做目標，威華達價見0.24元，現價潛在回報率高達85%。

莊中折讓大夠吸引

上星期推介天安（028），一個星期升咗31%。呢劑再揀落後內房股，揀莊中（298）。莊中今年頭到家陣，股價一路打橫行，現價（0.185元）講緊嘅NAV折讓，高達85%，仲誇張過天安。
莊中呢期已經話，計劃以合理價錢，出售非內房業嘅其他投資，總值7億銀。當打個五折，呢批資產可潛在套現價值，都講緊3.5億銀，都超過集團本身市值2.8億銀，亦係非常吸引。博莊中翻半番到0.28元，到時，集團NAV折讓未有耐上到70%。
錢雋