旺角行人專用區變大媽舞廣場已經唔係今日嘅事，不過估唔到大媽除咗大媽舞外，連鬼佬嘢都玩埋！有網民上載相片及短片，一名齊蔭紅髮嘅大媽搽白對手同塊面，扮外國街頭藝人表演「街頭定格」，但唔夠幾秒就轉一次騎呢甫士，被網民狂笑「擺啲甫士都知你大媽啦」，又話面上啲粉乾到裂晒，勁恐怖。
網民Wallace Hung上載短片，片中大媽身穿卡其色中袖外套、內襯勁閃珠片衫。

不過，最具標誌性嘅就係佢對肉色絲襪加拖鞋，雖然大媽味極濃，但學足鬼佬街頭藝人，前面放個紙箱，以中英寫上「請支持我們的旅程」。
外國嘅街頭定格藝術家至少定格一分鐘以上，但大媽唔夠10秒就換一次騎呢甫士，不過最恐怖都唔係佢嘅衣着同表演，而係佢個乾到「好似腳跟龜裂咁」嘅妝，有唔少網民都話勁似《咒怨》入面個伽椰子！
有網民就話原本位置之前有對真．外國人扮雕像，唔止優雅好多，仲真係郁都唔郁，可惜最近都唔見佢哋，亦有網民大鬧大媽唔專業，「扮外國嚟就以為有人會畀錢你咩」，更有網民叫佢不如喺紙箱寫番殘體字，「呃番自己同胞」。