告東尼從3月起戰績不斷冒升，三扒兩撥已在練馬師榜追番上第四位，而且接連捧盃，最近先後有「巴基之星」贏女皇盃、「時時精綵」奪皇太后紀念盃、「加州議長」勝出港澳盃等大賽，馬房手風明顯回旺，近三次日賽亦均有馬贏，今期（20日）當然要繼續吼實。

雖則告仔於周日（20日）田草十場賽事只出馬三匹，但均屬近績不錯的參戰馬，絕對有實力再添進帳。

今晨（18日）三匹賽駒「牛精輝煌」、「幸福分享」及「萬事欣」齊齊安排加操往內圈再試，告東尼就一如慣常踩單車到馬匹隧道出入口食糊位，監督三匹馬操練，動態依然積極。

上述三駒共通點是季內尚未贏馬交代，而最近一役分別跑得三至四名，既有近績支持，今次配合馬房季尾大攻勢，演出再進一步絕對不奇。