陳慧琳（Kelly）噚日現身九龍灣出席記者會，宣佈今個月25日首次喺麥花臣舉行音樂會。演唱會除咗獻唱首張數碼EP《Watch Me》內所有新歌，又會唱小部份冇咁hit嘅舊歌，Kelly仲挑選咗五首歌畀歌迷網上投票，選出當晚最想聽嘅歌曲，而Kelly話自己心水係《我會掛念你》，因為配合現場樂隊演奏可以玩到好勁。

老公湊囝囝

Kelly透露完成音樂會後，就會同家人去旅行，暫時未知去英國定美國。佢近日忙於排練音樂會，所以湊仔重責交畀老公，不過老公都試過同朋友出去飲酒睇世界盃放鬆。
講開囝囝，Kelly大仔蝦餃仔已經九歲大，擁有自己電話，仲不時偷影媽咪。Kelly話：「成日偷影，不過冇set佢電話可以上網，不過遲啲都控制唔到，到時喺屋企都要戴黑超同set頭，最緊要教佢打格仔，打媽咪塊面。」原來蝦餃仔已經同媽咪傾男女關係，Kelly話：「其實佢每一年都會揀一個女仔鍾意，都靚㗎，但係好多時對方冇反應，今年嗰個亦都冇理佢。」
撰文：馮仁昭