高海寧日前喺fb貼咗條做Gym嘅片，高ling話佢喺夏天好鍾意著睇露臍裝，又話女仔如果有條馬甲線同埋背脊嗰條線會好靚，佢笑言自己會為咗呢3條線努力。

噚晚高ling喺蘭桂坊出席週年慶祝派對，着住白色連身裙大晒弗爆成果，高Ling話：「運動係因為就嚟夏天，嚟緊會有新劇開拍，要以最好狀態拍嘢。」問佢使唔使騷body？高Ling只肯透露故事內容需要着緊身衫，全身都需要好弗咁話，雖然高Ling已經同肚腩say bye bye，但係佢對o依家嘅狀態都唔係咁滿意，希望可以再想瘦多少少，佢堅稱：「一向都係23、24，希望可以再結實啲，不過如果要去到21腰就好似超出我嘅界限，因為我有咁上下高。」

之不過條腰咁瘦，上圍咪會更加突出？高Ling笑言：「運動多係想firm啲，反地心吸力好緊要，有朋友結婚生小朋友，仲餵人奶，會提我呢樣嘢，所以要提早運動，避免地心吸力。」咁快就諗定生B餵人奶？高Ling話：「要呀，每個媽咪身材都好好，提醒話我知。」

陳偉霆嘅巴西籍緋聞女友Bruna Marth亦都有出席活動，Bruna就話o依家有去上海、北京地方發展，問到係咪會約埋喺大陸做嘢嘅William聚吓？Bruna就話唔可以透露，但就承認大家係好朋友關係，再問到佢係咪利用William提高自己知名度？Bruna即收起笑容：「我沒有用他來提升知名度。」

至於William經常被指扮韓星G-Dragon，Bruna就話兩個都有不同之處，但直言因為William係佢朋友，所以覺得William靚仔啲。

精選娛聞，喺晒《娛果》
http://fb.com/appledailyent