【李華華online】滙豐贊助青山醫院 建全港首家精神健康體驗館
蘋果日報 2020/06/11 16:11
滙豐青山醫院
青山醫院行政總監林明醫生（右二）、滙豐總經理兼亞太區環球銀行業務主管廖宜建（左二）、滙豐亞太區企業可持續發展總監張惠峰（左 一）及青山醫院法醫精神科部門主管蕭慧敏醫生（右一）。
最近一年疫情再加上政治環境動盪，搞到香港人個個精神壓力爆燈，對精神健康亦越來越重視。好在滙豐贊助青山醫院嘅首家精神健康體驗館（Mind Space）終於正式落成，遲吓等免費開放，華華一於都去參觀吓。
話說滙豐之所以贊助Mind Space，要講返2015年銀行慶祝成立150週年，從慈善計劃入面撥款3.77億資助本港慈善團體，而青山醫院就係其中一間。今次成個體驗館都係由院方構思同籌建，用咗虛擬實境技術（VR）模擬精神病常見病徵，好似幻覺、幻聽等，等公眾親身感受精神病患者面對嘅情況，可以更加明白精神病患者處境同加強社會關注。
除咗模擬體驗，體驗館仲有介紹青山醫院歷史、精神病治療同藥物發展。醫院亦邀請咗部分精神病康復者擔任朋輩支援員，可以即場同參觀者交流，分享患上精神病對日常生活嘅影響，同專業治療嘅幫助。Mind Space預計每年可接待1.6萬人，今年內就會開放俾公眾免費參觀。
滙豐集團總經理兼亞太區環球銀行業務主管廖宜建前排參觀過館內設施，佢都話唔少人因為社交、工作或個人生活面對壓力，導致精神問題。尤其近排疫情持續，好多人都有壓力同負面情緒，所以叫大家要主動關心身邊其他人。
-----------------------------
-----------------------------