當年今日
關於我們

隔牆有耳:周梁呢期 黑到落腳趾尾 - 李八方

蘋果日報 2008/01/11 00:00


自由黨副主席周梁淑怡近排頻頻俾人質詢,解釋旅發局「大花筒」指控,佢俾人諸多抽秤十分黑仔,好彩有個外孫女𠱁番,所以不時去女兒半山麥當勞道晨光大廈寓所探外孫女,正牌廿四孝婆婆。周太弄孫為樂,可能想黐番啲福氣轉運,點知竟然俾大廈住客指阻頭阻勢。
有個住客向八方呻,指晨光大廈共有20伙,但僅得8個車位,不設訪客車位,附近又冇時租車位或咪錶位,所以周太嚟親探外孫女,惟有將架車泊喺大廈停車場通道,不過咁搞法,其他司機就企晒喺度,冇得出冇得入。
有個住戶仲影低周太架車阻塞通道相片畀八方睇,照片可見周太架積架確係泊喺停車場出入口,「好似大晒咁。」八方深入了解後,卻發現件事未必咁簡單,事關晨光大廈停車場有兩個出入口,就算周太架車泊喺其中一條通道,仲有第二條路行,唔會困死晒。
看更同八方講,晨光大廈入伙成50年,半個世紀以嚟車位都係僧多粥少,「任何訪客、裝修工人或送貨嘅,都係泊喺路口,唔夠車位有乜辦法?」佢話如果有車出入,會通知司機暫時駛開讓路。佢話見過周太嚟探孫,不過次數有限,「佢個女上個月先搬入嚟住,阻得幾多次?」
周太話佢都驚泊車喺通道阻住人,不過看更話冇問題,個個訪客都係咁泊,佢就照辦,而且停車場有兩個出入口,就算一時間搵唔到佢都唔怕,但佢有交帶看更,如果有車出入,第一時間call佢駛開架車,「冇優待我喎!事實上都冇人向看更投訴。」
八方問過一名晨光大廈業主,佢建議周太最好喺擋風玻璃留低聯絡電話,萬一看更行開咗,其他司機都可以急call佢「褪」車,應該可避免好多拗撬。八方覺得周太掛道靈符或八卦喺車入面可能仲實際,事關旅發局單嘢仲未搞掂,自由黨成員蔣麗莉又俾人告,似乎幾黑仔,周太都係想辦法趨吉避凶好啲,或者狂冲碌柚葉凉都得。
周太女兒所住單位,係周太母親持有,老人家共有兩個晨光單位,據講係周太父親早年購入。晨光單位全部過千呎,𠵱家呎價約一萬蚊,據講長江、恒基都有「落釘」,長揸候機重建。