香港都好耐冇搞過純玩具展，TOYSOUL2014今日開始喺九龍灣國際展貿中心，一連三日舉行，佔地3萬幾呎，40幾個參展商，記者噚晚漏夜走咗入去一轉，同大家優先睇吓有乜新玩意；講佔地最大的，一定是PlayStation嘅區，剛啱適逢20周年，仲會即場派發早前預訂「PlayStation20周年紀念版」主機！據知只係限量90部，全部配額已經落實，唔使花心機去碰運氣喇！不過現場都有呢部復古版灰機做Display，買唔到！嚟現場睇係最後一次機會。
另外留意，現場仲有史萊姆版PS4（$3,880）同由$38-$88嘅原裝遊戲賣。

舊Game任打扮機舖
行過PlayStation展區，會有一種好強烈嘅感覺，就係好似入到機舖一樣，因為佢將好多經典街機移植作，Show晒出嚟任人玩，而且加埋個大手掣，整到成部雙打街機一樣，經典遊戲有《拳皇97'》、《吞食天地》同《TimeCrrisis4》咁，不過最最最過癮，都係將PS版蛇叔放埋出嚟，相信PS年代的老機迷，冇人未打爆機吧？不過今日再打返，記者連第一排序章都覺得好有難度！另外留意，在街機區背版後，有一個街霸影相區，玩法創意無限，你想用昇龍拳破波，定用軍佬腳刀呢？個人建議係用青狼中波嗰吓，但頭髮要竪直晒喎！

歷年遊戲珍藏晒冷
身邊唔少朋友都話自己係PlayStation收藏家，不過你哋手上有幾多年係珍品呢？乘住20周年之勢，香港PlayStation將佢哋自己咁多年來嘅重點收藏品，一次過展晒出嚟，歷代嘅主機、小型座枱式太空侵略者、GT連喼嘅賽車鞋、PS2年代的眼鏡形電視、FF-X2嘅槍形控掣器，如果遊戲機資歷淺啲，真係隨時聽都未聽過。

記者：朱崇德