曾為SBS電視王牌節目嘅《Running Man》，開播7年但收視已大不如前，去年尾更爆出宋智孝、金鐘國被炒魷風波，引起粉絲不滿，及後《RM》方面向兩位成員致歉並表示節目會停播，但於今年1月節目組又反口指《RM》會繼續播，已經令唔少粉絲對《RM》失去信心。

直至今年4月，《RM》宣佈加入新成員全昭旻及楊世燦，以及換上新導演以示改版。雖然粉絲對於加入新成員一度感到不滿，但改版後嘅《RM》收視率卻有好轉，由原本低迷嘅3%，正維持喺7%-8%收視率，雖然同往年雙位數收視率相比仲有好大距離，但就收獲唔少好評，有粉絲及網民留言大讚節目搞笑咗、好睇咗。

而《RM》嘅新導演近日接受韓媒《SBS funE》嘅訪問，重提成員被炒魷一事，導演強調：「外界一直都誤會，認為節目組同成員之間會因為呢件事而感情變差，其實真係冇，最近更一齊去咗全昭旻嘅喬遷宴，慶祝佢搬新屋，我哋同成員嘅關係依然好好。」提到節目新形式有唔少海外特輯，導演直言：「好多謝成員一直以嚟嘅支持，先可以安心去海外拍攝。」