緋聞對明星嚟講從來都係好事，至少可以當宣傳。林峯同李彩華呢對陳年緋聞男女，前晚都玩噱頭喺跑馬地幫DKNY同台行騷，李彩華話七年嚟首次同台，但絕無尷尬。
問到呢輪李彩華另一緋聞男友蕭定一公開拖女模石詠莉，又被影到同四洲集團太子女戴凱欣夜蒲，佢話：「內情我唔知喎，我啱啱喺外地做完嘢返嚟，不過我覺得佢都到適婚年齡，我都替佢心急㗎。若果佢真係有女友，梗係開心啦。」
問李彩華係咪甩難？佢話：「咁又唔好咁講，話晒我拍過佢廣告。」佢仲話自己都見過石詠莉，問佢覺得兩人襯唔襯？李彩華即暗寸蕭定一，陰陰嘴笑話：「佢哋高度都幾啱襯囉！」

蒙嘉慧擺架子

同場行騷嘅仲有樂基兒、AmandaStrang等，而蒙嘉慧（YoYo）、鄭希怡（Yumiko）、熊黛林就坐喺台下做嘉賓，YoYo自從同鄭伊健拍拖後，態度氣燄明顯強好多，一問佢送乜嘢生日禮物畀伊健，YoYo話：「冇諗過，冇準備喎，如果嗰日要開工咪慳番囉，你哋唔使記佢生日，記我啦，我8月3日。」問佢係咪同伊健夾好唔講感情？佢話：「私人嘢我講夠喇！」