滙控(005)大班葛霖,喺英國公佈完靚靚嘅中期業績後,就馬不停蹄來港與傳媒會晤,可能支持得環保發展多,辦公室冷氣唔好過凍,佢一坐低好自然咁除低件老西。
作為馬仔嘅滙豐銀行主席鄭海泉果然眼明手快,亦隨即脫下西裝。仲笑笑口話:「Whatchairmandoes,wefollow」(主席點做,我哋梗照跟),服未?接替肥仔邵嘅新任滙豐銀行CEO霍嘉治亦唔執輸,照辦煮碗,主席枱登時展現三件恤衫反白到幾乎眼花嘅環保賓架造型。
大笨象一般不成文規定,高層做到60歲退休,葛霖同鄭大班都年屆58,對於會否延長退休計劃,溫文爾雅嘅葛霖話,自己同Vincent(鄭之洋名)都仲好年輕,𠵱家講退休言之過早云云。
職事聖公會牧師嘅葛霖,10多年前舊作最近譯成中文版《天國與財利》,反應熱烈,多年嚟喺金融市場打滾,佢話即使今日重寫此書,都維持相同基本信念,即係成功唔一定要出賣靈魂,搵銀唔使一定做陰質嘢。