馬季進入倒數，馬迷最關心話題除咗潘頓定莫雷拉做冠軍騎師，「巴基之星」定「美麗傳承」當選今季馬王之外，另一樣最多人講嘅就係，到底今季有幾多個練馬師護級失敗，告達理護級機會已經好渺茫，只係睇吓李易達可唔可以走得甩。

周中（20日）停火前嘅上次日馬，護緊級嘅鄭俊偉同麥菲文都有頭馬見面，離望見家鄉又近一步，米高鄭上季喺煞科日先啱啱贏夠數上岸，唔知今季係咪又會歷史重演，但就算最終護級失敗，佢都係第一次收警告信，只係攞面黃牌，唔使擔心執包袱。

呢一刻護級嘅壓力好似集中喺李易達身上，佢嘅處境又真係水深火熱、危急存亡，呢七次賽事若果贏唔到三場馬，就累積三次唔達標，都唔使望下季有得續牌。

下游倉好多時畀馬迷嘅觀感都係熱倒冷爆、作風閃縮，唔少馬迷見到啲下游練馬師掙扎護級，好多時都會有落井下石嘅心態。

雖然李易達有個花名叫「奸仔達」，但唔少馬主都話，其實佢都係有嗰句講嗰句嘅練馬師。

牌照委員會啱啱發咗牌畀丁冠豪，下季正式升正做練馬師，據聞丁仔事前毫無心理準備，係公佈當日先收到通知。

表面上，丁仔係填番今季吳定強退休個位，但係有圈中人就從陰謀論去推測，可能牌照委員會都驚，今季最終會係告達理同李易達雙雙肥佬，萬一下季又少多兩個馬房就真係大件事，權衡下提早發牌畀丁仔開倉，揀定替補人選就有備無患。

至於今季新開倉嘅麥菲文，近排頻頻有馬拉倉，若埋單唔達標的話，相信留低嘅馬主會更加動搖，難保兵力進一步削弱，眼前一樣係要盡贏，否則下季處境會更加艱難。

阿Joe