熊黛林（Lynn）上月27日低調下嫁家族坐擁百億資產的郭可頌（相關新聞： http://bit.ly/2fnkTlH ），之後各有各忙，只係時不時喺微博放閃貼相晒恩愛，今日新婚人妻熊黛林應邀出席化妝品新聞發佈會，同場仲有樂基兒、蔡卓妍、衛詩雅等。

熊黛琳一現身，即被記者叫佢做「郭太」，佢笑笑口話：「都未係好慣，以為叫我奶奶。」百億新抱勤力開工，點解唔做少奶奶？佢話：「唔會，一路會做嘢，未有小朋友前會做嘢博命搵錢。」

講到佢係百億新抱，Lynn就好緊張話：「咁誇張，唔係呀！哎呀，太誇張，唔好咁樣，都驚有危險，唔知情以為係咁誇張，有機會要盡力做，要珍惜機會，以後有小朋友可以少啲，o依家享受工作。」

講到生仔，新婚夫婦係咪不設防？Lynn笑笑口話：「暫時未有好消息，努力中，希望可以快啲。」Lynn直認開始調理身體，身邊好多朋友都提供生B秘方，佢話：「自己會注意，例如唔好食咁多海鮮、凍嘢，我都好聽話。」有冇想生仔定生女多啲？佢就顯得有少少心急：「呢個唔緊要，最緊要快，仔女無所謂，老公身體不嬲好，我自己做呢行食無定時，身體差啲。」之前Lynn擺過婚紗相「放閃」，佢解釋：「輯相之前影婚紗相，唔會再擺酒，簡單啲。」

早前Lynn被發現多次到日本城買日用品，非常慳家，佢話：「日用品，冇需要買名牌，最緊要好用，好有好有錢嘅人會買金，我哋大家辛苦搵錢無需要浪費。」Lynn表示會學廚，因為管男人最緊要管住他的胃，她笑說：「雖然佢o依家已經好黐家。」