日本搖滾樂隊GLAY將於本周六喺亞博館舉行「GLAY ARENA TOUR 2018 SPRINGDELICS IN HONG KONG」演唱會，而來港前佢哋噚晚喺台北小巨蛋開騷，吸引8千粉絲捧場。

GALY事隔五年再去台灣開騷，台迷挺力支持，主唱TERU來台前已苦練中文，打算喺演唱會上一展成果，點知粉絲完全聽唔明，令佢喺台上崩潰大喊：「我嘅中文完全唔掂通，0依家點算？」又搞笑叫粉絲留意舞台上嘅字幕。GLAY由TAKURO、TERU、HISASHI及JIRO早於1988年組成，今次係佢哋第三次赴台開騷，HISASHI大前晚一抵台就喺網上晒酒店送嘅迎賓蛋糕，TERU就提醒粉絲：「我們還想喺台北小巨蛋開騷，麻煩大家要配合！」同時亦抽空去做咗腳底按摩。

演唱會比原定時間遲咗10分鐘先開騷，但無損粉絲熱情，佢哋以《the other end of the globe》揭開序幕，又高喊「一起唱」，佢仲多次激動喊「台灣」，不忘告白台迷：「好想你哋，今天盡情享受吧！」演唱完《Long Run》後，TERU用中文問：「開心嗎？尖叫喔？」但是唔少粉絲都聽唔明，唱到《SOUL LOVE》時，TERU把歌詞改成「台灣 我愛你」，令粉絲驚喜不已。之後GLAY一連演唱8首歌曲，同台迷傾計時，TERU哀怨表示自己中文真係唔得，又反問粉絲可唔可講日文。最後佢睇住電視一字一句跟住念中文：「今天又能站在這裡，真的覺得很幸福，真的很感謝所有的歌迷」，雖然發音唔準確，但台迷自然照單全收。TERU整晚又唱又繞住舞台奔跑，完全唔影響水準，實力驚人，令人難以相信佢已46歲。

唱到encore，GLAY四子再次現身舞台，接住更介紹五月天出場，透露兩隊樂隊已結緣16年，今天選擇演唱之前幫五月天填詞嘅《Dancin’ Dancin’》，更齊齊JAM歌，TERU宣布五月天5月19、20日將在日本武道館開唱，仲問阿信：「我也可以參加嗎？」阿信用日文回：「當然可以！」不過阿信落台後，TERU竟偷偷警告粉絲：「日本台灣這樣交流是很棒的事，但如果你們要喜歡阿信，我會阻止的！」令8千粉絲引發笑聲。​另外，TERU話對於日本地震時受到很多台灣人幫助，呢次台灣（花蓮）地震，GLAY都想為台灣交出一點心意，希望能捐出今次演唱會嘅部分收入，感動台下粉絲。

更多娛聞，喺晒《娛果》
http://fb.com/appledailyent