【Little Englander】英國人終於學懂真誠(孫柏文)
英國孫柏文Little Englander
英國政府佛系抗疫咗幾日後,忽然180度飄移,學大陸全國半封城三周。
相信大家同孫柏文一樣,都聽過話英國人最出名虛偽。流氓DNA,扮晒紳士。唔妥你,又要表面客氣。不過唔同一樣當你係野蠻人嘅大和民族,英國人表面客氣時,又要忍唔住、點都要向你表露啲對你嘅contempt。
大家都知武漢肺炎殺到英國。英國政府佛系抗疫咗幾日後,都忽然180度飄移,學大陸咁玩全國半封城三周。當然,英國差佬唔會攞個斧頭劈爛啲麻將檯,頂多都係「驅散」啲圍爐燒烤嘅群眾。
點都好,未信全民戴罩嘅英國人,都實施兩米嘅人隔人social distancing。就係呢個政策,我係咁大個人,做過殖民地子民,同啲英國仔做過同學,住埋喺倫敦後,第一次感受到英國人集團流露真誠。真係好滾動。
點感受到?我住喺啲多層大廈,低樓層。所以落樓時,好多時候當架電梯到,裡面已經企咗個人。呢幾日我見到咁,就會合十雙手,企到電梯外遠一遠話:「Please,go ahead。I'll wait for the next one。」
武肺前嘅英國人,一定會交足戲咁,又要頂住度門,又會問:「Are you sure?」今時今日就只會點點頭,即刻港式撳閂門掣。確實開心英國人咁坦誠擁抱本身長存嘅冷漠。
去到落筆呢刻,有越來越多名人中招。冇再用社交媒體嘅我,平時都係等新聞報道先知。點知今日,有個人確診後,我嘅短訊app都洗板咁收到各方來訊,話佢中。
香港、澳洲、紐西蘭、馬拉、印度、南非等地嘅朋友,都寄短訊過來講呢單嘢。我通通都回覆話:「英女皇佈陣,終極解決卡米拉問題。如果威廉直接做皇帝,咪唔使再諗查理斯條女點署理囉!」
因為呢個始終係英國帝制最大嘅潛伏炸彈。一嘢搞得掂,都咪話唔受落。齋睇啲新聞網站讀者留言,最多人like嘅都係:「當年咁樣對戴安娜呀嗱,仲唔係時候有報應?」呢個世界最團結、最心狠手辣嘅,都一定係嗰個「國際大婆共榮圈」。
最後,睇英國佬點抗疫,成功與否都係未知之素,不過結果未知前,已經有個重傷者。係邊個?就係專做香港移民去英國嘅生意人了。
二月時,記得特區政府宣佈今個學年作廢時,彭博訪問咗個香港搬運公司。佢話雖然反送中時,已走咗班鬼佬。不過佢話要特區政府宣佈封學校後,就真係爆逃亡潮。點知武漢病毒嘅威力,強到全球學生放假。唔知彭博會否再訪問嗰個仁兄,現況如何呢?
咁我不能否認,我係有諗過鋪路將我本A貨BN(O)換做真英國護照。而喺呢場各國都叫「抗武肺之戰」下,英國政府宣佈為佢哋國家醫療系統NHS舉自願兵廿五萬人。我都已報名參軍。
不過因為我冇車,只能做啲留家講電話嘅工作。所以如果你係個住英國,因高齡或有長期病患要留在家嘅人,又悶悶地搵人傾。傾嗰個可能係我。
做吓呢啲,第時換護照時,見移民官都應該易啲。因為冇得話我對國家冇貢獻啦?
-----------------------------
【武漢肺炎】專頁 全民自救 抗疫資訊盡在《蘋果》
-----------------------
屬於香港人的移民攻略
立即登入
【全球樓行】 Dream House零距離