松岡李那今日喺會展為婚紗展行騷，返回後台時，佢哼住婚禮歌，問佢係咪好想結婚？松岡表示有個占卜師，指佢33歲會生好多小朋友，佢話：「我比較鍾意仔，我想生7個，占卜師仲話我未來老公都好鍾意小朋友，但係我唔記得問占卜師，我未來老公係咩國籍。」唔知佢又鍾意咩國籍嘅男士呢？松岡表示：「因為我父母唔識英文，搵個日本人就會易溝通，但我又鍾意中式婚禮，我鍾意坐花橋，成手都係金器，不過我都鍾意日本和服。」

雖然松岡對結婚充滿憧憬，不過佢透露現時冇男友，佢話：「我今年要過一個lonely christmas，我可能約啲單身朋友，搞個單身派對。」松岡又指覺得2017年好快就過，不過今年收入不錯，雖然未能夠喺日本置業，但呢個絕對係佢目標。

更多娛聞，喺晒《娛果》
http://fb.com/appledailyent