韓劇《Doctors》女星朴信惠及型男蘇志燮早前飛到濟州島，拍攝王牌製作人羅暎錫嘅新綜藝節目《森林中的小屋》，節目已定於下月6號首播，同時於今日公開咗長達5分鐘嘅預告片。

朴信惠及蘇志燮分別喺濟州島森林嘅小屋中獨自生活，回歸大自然，預告一開始只見兩人喺屋內對於窗外景色發呆，之後收到製作組嘅指示，要將非必要嘅品物歸還畀製作組保管，立即令兩人陷入崩潰。

除此之外，朴信惠及蘇志燮更要自己劈柴、鋸木生火煮嘢食，對於朴信惠嚟講係一個大挑戰，佢都做到抖晒大氣，當食完個晚餐，朴信惠都似乎已經攰到冇力氣講嘢。不過朴信惠就好識自娛自樂，拎住個假mic唱歌都好開心，外出睇風景散心時更幸運見到四葉草令佢大感興奮。

更多韓流，喺晒《娛果》
http://fb.com/appledailyent