近日興講「離地」兩個字，意思即係太唔實際、高大空，例如「離地中產」、「新聞自由太離地」，其實講離地，官員應該問鼎全港總冠軍。噚日立法會一場與高官新春午宴，官員同議員比試，由立法會秘書處出題，估吓平日各項民生收費格價幾多，經常喺冷氣房嘅官員隊，錯到離晒譜，何止離地咁簡單，「精準」啲講，係脫離群眾。

被網民取笑住在火星

呢次比賽由三位高官包括勞工及福利局局長張建宗、環境局局長黃錦星、新聞處處長聶德權，對撼民建聯譚耀宗、葛珮帆、工聯會嘅王國興，最終由議員隊以一分之微勝出。秘書處向兩隊分別提問各項收費，越接近答案就可攞分。其中一條題目問公共泳池每月收費係幾多，三位高官最後竟然寫咗90蚊，即係一個月游足30日，每日都係3蚊雞，議員隊就估323蚊，正確答案係300蚊。
2012年政府宣佈呢個月票計劃時，市民拗到牙血都出埋，政府都係只肯減價50蚊，難怪官員隊揭開自己嘅答案時，畀台下笑到面黃。立法會主席曾鈺成笑笑口話，月票90蚊係應該係官員嘅「口頭承諾」，公共泳池月票有望三折發售。值得一提嘅係，同樣估錯嘅議員「亡國興」，當年要求月票減價，話咁快唔記得。難怪有網民話，呢班高官何止離地，而係住喺火星。
官員答錯又何止呢條？有條題目問成人圖書館，一本書遲還一日要幾罰幾多。官員答案高咗成倍，估係3蚊一日，議員就答兩蚊，正確答案係1.5元。
笑聲背後，長毛再次藉呢個埋身機會，向狼英示威。佢送咗支寫上「大話精專用」嘅漱口水畀佢，高喊「我要全民退保，不要大話特首」，狼英當然當冇事發生，四位立法會保安人員合力將長毛拉走，令一眾官員、議員可以繼續歌舞昇平，離地萬丈。

李八方
mailto:[email protected]