神劇《大時代》今個星期隨住丁蟹案件開審進入高潮，楊羚飾演嘅方敏，嚟緊因為俾丁家手下貼街招四圍唱有性病而跳樓，而方芳吳詠紅同方婷李麗珍，亦因為丁蟹被判死刑而俾丁家四兄弟大報復，買兇將佢哋掟落街慘死，令方家幾乎滅門。

怕咗潘源良

不過今個星期六（30日），方家三姊妹將齊齊「復活」，同大佬孝邵仲衡出席銅鑼灣皇室堡商場舉行嘅「回味經典90年代」活動，而今次亦係23年嚟三姊妹同大佬孝嘅首次世紀重聚。
記者前日打畀大佬孝，佢話：「我淨係知有珍妹，唔知三姊妹一齊咁巴閉囉！羚羚就早幾個禮拜喺nowTV見過，其他兩個真係N年冇見。」方家三姊妹嚟緊會慘死，馮仁昭問大佬孝擔唔擔心佢哋大報仇時，大佬孝笑住話：「唔緊要，鍾意點玩都得，我好玩得。」馮仁昭建議佢同珍妹重演當年狂嘴，大佬孝即時縮沙話：「嘩！呢個唔得，潘生（潘源良）我識佢㗎，大佬，唔好害我呀！但我哋可以借位嘅，專業演員嚟㗎嘛！」至於吳詠紅前日亦話好期待，仲講明要向大佬孝大報復：「大家一齊揼佢。」
撰文：馮仁昭