林嘉欣今日喺圓方出席「第二屆香港兒童國際電影節活動」，嘉欣以電影節大使身份負責揀選電影，而今日所表演嘅音樂部分，都係由嘉欣畀意見，仲搵咗個女嘅樂器老師幫手，教大家用回收嘅樂器嚟演奏音樂，佢話：「我覺得任何嘢都可以保持開放嘅思想，用回收嘅物料，製造出唔同嘅音樂，我覺得好開心。」

嘉欣透露囡囡都有學敲擊樂，但係就唔多鍾意表演，話個女學音樂唔會為分數同為上台，等到適合嘅時候先決定。問到囡囡嘅音樂天份係咪比自己好？嘉欣笑話：「我真係絕對冇呢個天份，我只係識做戲，做戲開心啲，小朋友發展順其自然啦。」至於問到暑假會安排乜嘢節目？佢話：「都係同佢哋玩，放電，去游水同埋約朋友，因為平日星期一至五都有活動，等佢哋輕鬆吓。」

至於問到嘉欣投入到小朋友嘅世界嗎？佢話：「佢哋好多嘢同我講嘅，我哋會有pillow talk，會傾下學校嘅嘢，同學之間嘅事。」問到係咪傾男朋友嘅事？嘉欣就話：「唔係，多數都係生活上嘅嘢，未去到八卦嘢，我都唔希望咁快同我講男朋友啦。」個女拍拖會唔會唔捨得？嘉欣就笑話：「爸爸應該更加唔捨得，佢會辛苦啲，不過大女都未到8歲，諗吓暑假睇乜戲仲開心啦。」

精選娛聞，喺晒《娛果》
http://fb.com/appledailyent