房祖名同柯震東前年喺北京捲入吸毒事件，一個喺內地判入獄6個月，一個就喺台灣自費戒毒。但事件冇就此了結，除咗祖名上年有份演嘅《道士下山》因為陳凱歌同老竇成龍力保之外，佢同柯震東之後就一直俾內地封殺，所有演出嘅電影同電視劇都拎唔到准映證，廣告同電視節目就更唔使諗。

留台等機會

當大家都以為件事過咗成兩年，應該差唔多係時候解封，但馮仁昭聽北京電影局嘅朋友講，完全冇收過任何會解封嘅消息，話佢哋嘅命運可能同陳冠希一樣，係無限期封殺！
房祖名老竇成龍喺內地咁有份量，當然有努力為個仔奔走，但呢次因為涉及毒品，官方企得幾硬，要利用柯震東同房祖名殺一儆百，等所有年輕人知道只要涉及毒品就前途盡毀。呢對難兄難弟目前可以叠埋心水喺台灣同香港發展，祖名父母係成龍同林鳳嬌，資金方面根本就唔愁，成龍已經準備安排祖名喺台灣出唱片同做電影幕後工作，相反柯震東就慘啲，背後冇咗大靠山，發展主力局限喺台灣，的確會難發圍啲。
撰文：馮仁昭