林敏驄入行35年作品展演唱會今晚繼續喺紅館舉行，吸引到張智霖同老婆袁詠儀嚟捧場，佢哋仲坐喺第一行。大會喺8點33分開騷，rundown同噚日一樣，孭結他喺台邊行出嚟，觀眾報以熱烈嘅歡呼聲，佢先係繞場一周，不停做手勢示意啲觀眾打拍子，然後用結他演奏《EUROPA》，之後首隊出場表演嘅嘉寶就係太極。

跟住大會播出電影《全力扣殺》片段，而主演嘅何超儀、劉浩龍（師兄）、邵音音及音音姐個女婿波多嘢裕介就上台撐阿驄，提到另一主角鄭伊健缺席，阿驄就話：「蒙嘉慧驚佢受傷，搵個籠困住佢呀！」之後佢哋chit chat咗一輪，講咗啲有味笑話，阿驄就用佢個獨特style去提及噚日發生嘅冧台意外（新聞連結： http://bit.ly/2s8eR0V ），佢話：「噚晚呢度發生咗少少非工業意外，不過我哋打不死，要有正能量。」跟住眾人唱出《來吧！人類要奔放》。其後何超儀換上金色和服打扮唱新歌《何飄移》，不過一起歌佢就已經連續唔記得歌詞兩次，要求重唱。

去到演唱會中段，阿驄拖住另一位嘉賓苟芸慧（苟姑娘）繞場一周，唱出《忘不了你》，苟姑娘幫阿驄掃頭髮，又挨落對方個膊頭度，阿驄又整蠱苟姑娘，叫觀眾隨便揸苟姑娘……隻手。其間，陸漢洋向苟姑娘獻花，苟姑娘忍唔住甜笑。

之後阿驄同苟姑娘傾偈，佢問：「你係咪脫離處女黨呀？我諗住開部新戲叫《鐵金剛大破處女黨》，諗住幫你開光。咁你係咪結婚呀？」苟姑娘話：「你做咩咁問呀？你想求婚呀？」阿驄再答：「我要好認真咁考慮吓，結婚要好認真㗎！我帶你去後台做個體檢先。」