英國騎師郭能雖然開季首三戰停賽缺陣，不過自從9月24日復出以來，每個賽日均有馬贏，加上本身號召力唔算大，所以頭馬普遍有唔錯分頭，好似剛戰就替初出之「美麗大師」爆半冷贏馬。講開呢位騎師，佢體重都唔輕，騎120磅以下馬，都要超磅上陣，而今季郭能只曾一次騎120磅以下馬超磅出賽，嗰隻就係「一定旺」，結果立即贏馬，證明佢騎呢類馬必定有計。
今期賽事有兩匹輕磅馬寧願超磅上陣蝕底，都要起用郭能，分別係第五場「金獅猛將」及尾場「魅影蹄飛」，前駒上季尾一役正是超磅用郭能入位，人馬故劍重逢，泥地一哩乃首本路程，反正實有分頭，值得一博。至於「魅影蹄飛」近兩次贏馬都係由郭能經手，熱身一仗後，今次唔怕蝕底寧願超兩磅，都要回配郭能，睇得出幕後已有蠢動之意。