當年今日

【馮仁昭四圍超】
千嬅𠱁樂仔 等入金像獎

蘋果日報 2016/12/08 00:00


電影《一念無明》嘅黃進獲金馬獎最佳新導演、金燕玲獲最佳女配角,前晚余文樂、方皓玟同黃進等喺尖沙嘴為電影優先場謝票,楊千嬅都有捧場,講到老友樂仔金馬獎冇提名,千嬅曲線鼓勵老友話:「最重要係遇到好劇本同得到認同,每個地方影展角度都唔同,香港電影金像獎又未到,可能佢有呢!喺呢行日日都係機會,好多人睇完都讚佢演出。」
拍戲精神緊張
樂仔就話再諗番起當日拍嘅沉重心情,都唔係咁舒服:「一般人未必知我哋情緒起伏咁大,可能自己都唔察覺,有時會精神緊張、神經衰弱、好𤷪𤺧,但唔好覺得自己係黐線佬,呢啲係都市病。」有人提議佢拍拖減壓:「拍拖冇好得夾硬嚟,拍得唔開心可能仲衰咗!」
另外,彭浩翔噚日喺facebook放咗張《春嬌救志明》現場拍攝嘅相,見到千嬅同樂仔着住睡袍喺酒店,彭浩翔留言:「這是一件神奇浴袍,如果明天中午12點前,這專頁有一萬個Like的話,神奇浴袍將自動打開。」
撰文:馮仁昭
empty
樂仔同千嬅件浴袍係會自動打開。互聯網圖片