樂隊ToNick成軍已經十年，不過呢個名對冇留意開香港獨立樂隊嘅讀者會有啲陌生。ToNick初期風格以Pop – Punk為主，而且歌詞夠抵死，所以吸引不少年輕樂迷。好似有講大台關家姐攞錯獎事件嘅《關心菊英》，11年ToNick開騷仲搵到關心妍上台一齊唱，可見關家姐夠大方，當晚現場氣氛真係high到癲！

唔只咁，ToNick幫成人網站ThisAV.com寫過一首名為《我不能忘記你》嘅歌，玩Live嗰陣仲會全場觀眾一齊「Ush！Ush！Ush！」真係要睇Live先抵睇！

雖然ToNick俾人感覺「乜都夠膽死」，但係夾咗咁多年Band，佢哋四個心態成熟咗，曲風有變化，歌詞着眼點都唔同咗。

11年ToNick《三幅被》MV入面，搵有鬚嘅鼓手晨曦扮女人，而且四子仲要化身「靚仔Boy Band」，深情望鏡頭，唔知仲以為佢哋要扮韓仔玩K Pop；而歌詞寫道：「唱嚟唱去都係嗰三幅被　唱嚟唱去都係要生要死」字字寸盡主流情歌。

咁ToNick四子點睇主流情歌同偶像歌手？晨曦就話：「o依家好難分主流，自己對呢個標籤冇特別，好欣賞做音樂嘅人。」小龜就搞笑話：「都係正面訊息啫，o依家香港好多慘情歌，但失戀唔使下下唱慘情歌，可以唱下ToNick嘅歌。」搞完笑小龜變番認真：「我都玩過舊歌，梅姐（梅艷芳）啲歌好勁，o依家韓國玩Hip hop、電子係主流；喺香港玩Hip hop嘅MastaMic都好努力做，但唔會覺得佢係主流歌手，冇辦法。我哋希望只要觀眾肯聽歌，我哋就開心。」

一路以來久不久都會有樂隊散Band，咁會唔會擔心有日輪到ToNick？小龜再次認真話：「夾band好似碧咸嘅紋身『生死有命，富貴由天』！每人嘅人生追求唔同，如果有日夾唔到，都可以各自發展，Beyond、Mr. o依家都係各自努力。」晨曦就話：「大家眼光可以有自己頻道，我唔覺得香港嘅Band消失，反而見到更多年青樂隊入嚟。」

攝影：仇志德
化妝：Candice Li