郭富城老婆方媛（Moka）噚晚以天王嫂身份首度公開亮相，着4吋高踭鞋到中環出席護髮活動，喺台上分享護髮心得，表現拘謹，生完囡囡半年嘅Moka極速修身，由城城經理人小美全程陪實。
Moka用普通話受訪，問到酬勞係咪好吸引夠買包包？佢話唔清楚，但坦言有私房錢。出席活動係咪要老公批准？Moka甜笑話：「老公尊重我鍾意的工作，但主要先照顧好家庭。」講到修身，Moka話冇減肥係自然瘦，𠵱家重43公斤。

唔愛鑽石

問到會唔會再生？Moka話：「天注定。」係咪不設防？佢坦言：「有小朋友更好，都有計劃的。」又承認會追仔。而小公主六個月大已經15磅，剛停餵母乳，仲爆老公爭抱囡囡。Moka坦言老公有送禮物獎勵：「有很多，但自己不喜歡鑽石，最緊要有心意。」至於下個月結婚一周年未決定點慶祝：「他經常有驚喜給我。」
同場嘅鍾麗淇表示大女有羊癇症，控制到兩年冇發作，但今年1月流感高峯期，幫佢打流感針：「但錯誤選擇，因為打咗幾小時大抽筋，call白車入院，好驚好內疚，都有喊，好在出咗院。」鍾麗淇怪自己，但唔會叫人唔好打，因為細女都有打，但大女就敏感。至於薛凱琪日前食物中毒曾經入院。
撰文：馮仁昭