博愛醫院第65屆董事局就職典禮，下晝喺洲際酒店舉行，雖然林建名個女林煒珊都係博愛總理，不過到場嘅林建名就笑笑口話，係去支持一位做主席嘅同事，而唔係阿女喎。

講完阿女就講阿林孝信啦，問佢阿仔有冇拍拖，或者帶女朋友同佢見面？林建名就話散拖應該有拍，不過女朋友就未見過喎，應該仲係選擇階段咁話，記者問佢阿仔有冇遺傳到佢嘅風流性格？佢就笑笑口咁話：「唔知呢？」

出面盛傳金牌大風賣盤，身為大名娛樂老闆嘅佢，就話冇人接洽佢，如果有人聯絡佢的話，都可以睇吓幫唔幫到手喎。

代表保良局出席嘅陳細潔，就話四太因為何生入咗院，同埋有會開所以嚟唔到，佢又話自己都忙到不得了，不過每日都仍然會抽時間陪吓隻寶貝狗仔。

講起近日有貓仔疑被恐怖吊死，又有人毒貓，佢就話喇：「錫動物嘅人睇到真係覺得嘔心，佢哋都係生命，但係咁做嘅人就冇當係，外國好尊重動物，希望政府多啲教育大家愛護動物同大自然。」