2020年 香港 中學文憑試（DSE）將於明天開考，對於今屆的考生而言，除了要應付考試外，在武漢肺炎 疫情 的肆虐下，同時要應付防疫的工作。今日苟芸慧在社交平台留言，為同學仔打氣：「工作，上課，準備考試！日子過得充實滿足……享受忙碌生活的我！溫馨提醒：疫情還沒過去，大家還是要留意。送上一張舊的上學照。」最後打tag同考生講加油！

現階段疫情不單對考生造成影響，各行各業都因為疫情出現裁員又或者停工潮，雖然苟芸慧開工拍廣告，但實情本身有不少工作受影響：「有好多工作延期，有啲暫時延期到年尾，但係都要視乎到時情況再決定，如果疫情仲係咁嚴重，可能到時候都未必做到。不過呢啲事大家都經歷緊，對我嚟講，等待嘅嘢可能係更美好，唔需要咁心急，或者都係一個好嘅經歷，可以畀我喺屋企多啲休息，諗諗之後嘅路點行，同埋睇多啲戲，欣賞下前輩演技，再次準備好自己。」

不過苟姑娘認為疫情對她最大的影響，是未能飛返加拿大見屋企人：「本身打算返加拿大探吓爹哋媽咪同細佬，我好想返去見佢哋，可惜而家飛唔到；我仲好想去旅行，惟有睇旅遊節目當去咗，有時播緊啲旅遊節目，我會叫老公幫我喺電視機前影相，當自己去咗玩。」至於目前在家生活，苟姑娘笑說：「留喺屋企都會做自己開心嘅嘢，例如整蛋糕，不過老公唔食甜嘢，整完都係攞落樓下請啲清潔姐姐食。」