大家好！小妹今日起會喺《蘋地》開壇輕鬆講地產，古語有云：萬丈高樓蘋地起，希望我副身家都有得起，還請大家多多支持！我有耐都未發達，但有樓一族就發過豬頭，樓價狂升，就算自住唔賣都心中富有，難為班無殼蝸牛眼都冤！不過唔使驚，奶媽喺大廳，新居屋已經接受申請，機會嚟喇飛雲！

今期新居屋咁矚目，因為有啟德啟朗苑、長沙灣凱樂苑兩大市區盤坐鎮，喺東涌嘅裕泰苑位置係削啲，但百零萬有貨揀，相信會吸引銀彈少啲嘅人。有人批評啟朗苑呎價近萬，凱樂苑最貴賣到630萬，雙雙破歷來紀錄，貴到離晒譜！但你有你鬧，第一日派表已經派咗2.4萬份，埋單隨時收15萬份，以4,431伙計，大約係34個人爭一伙，好難咩？中六合彩七奬（即係3個字）機率係61分之1，抽中居屋易好多喎！不過最大分別係中六合彩你有錢收，但抽中居屋就要畀幾百萬咋嘛！

入得紙睇怕都係諗住博一博，希望單車變摩托，但問題係呢一搏要畀240個大洋，足足比舊年加價20%！以15萬份申請表計，3,600萬房委會袋袋平安，但申請人除咗得到申請表同幾十分之一嘅中籤機會之外，連樓書、價單、示範單位都無資格睇，示範單位得模擬片段，樓書、價單就要8月揀樓先有！

記得當年發展商比人狂鬧賣樓唔透明，結果《一手住宅物業銷售條例》出爐，唔跟例最高刑罰係監禁七年，偏偏獲條例豁免嘅房委會，就帶頭做壞規矩！我知，2016年已經開始係咁喇嘛！但當年房委畀人鬧到反艇，兩年後嘅今日大家已經麻木晒，唔記得咗喇。你話我唔化都好，呢刻你收得人申請費，畀返足夠資訊買家參考係天經地義！乜都無，仲夠膽加價？

專欄作者簡介：
吳宛盈Carol
做咗10+年電視地產記者，又窮又奄尖喺香港上車無期，幾廿歳學人尋自由玩劈炮，乜都試又睇吓會唔會餓死？

Facebook專頁：
https://www.facebook.com/carolngyy