特首林鄭月娥今日下午開記招，宣佈暫緩《逃犯條例》修訂。

林建明（沙姐）一直反對送中，對於林鄭月娥宣佈暫緩方案，她今日接受《蘋果》電話訪問時揚言不收貨：「梗係唔收貨啦，點解唔撤回，點解要講暫緩啫，咁要面。佢講咩暫緩，其實等如撤回，梗係唔肯講呢個字，唔知點形容佢。」覺得林鄭應否下台？她說：「我覺得應該，搞到用子彈打啲細路，真係唔啱數，香港人自己打自己香港人，嘩，有冇搞錯！開槍，有冇搞錯！絕對唔可以咁做。」

林鄭繼續將6.12示威定性為「暴動」，沙姐說：「係離晒譜，講嚟講去講初心，乜乜乜，講廢話，真係講好多廢話，嘥鬼氣！其實佢出嚟講我現在暫緩，冇限期，得啦，嘥我時間。擔心學生O架，希望快啲搞番件事，全部要處理好，希望做到真係平息，現做啲唔做啲，唔知佢做乜。」明天會否參6.16遊行？她說：「梗係去！」

6.9有站出來遊行，兼幫手運送補給物資予示威者的王宗堯，亦不屑林鄭在記者會的回應，並揶揄林鄭：「不道歉、不反省、不問責、不聆聽，死性不改，不下台，我們不平靜，我們很憤怒，好無恥！」

王宗堯認為林鄭今次應該下台，他說：「yes，道歉……問責……下台……沒有……沒有你的班子，我們冇問題，第一次咁有訴求。」他表態明天一定會繼續參與由民陣發起的大遊行，並希望放過早前被捕的學生，他說：「其實特首係有特赦權，唔係佢所講唔可以牽涉。」王宗堯最後補充：「大家加油，多謝林『奠』。」王宗堯指刻意用「林奠」揶揄，他說：「要人哋尊重你，首先你要尊重人先。」

袁彌明也感不滿，覺得林鄭沒誠意，她以短訊回覆：「我哋只會接受撤回，林鄭撩交打式暫緩係騙局。對於警察濫用暴力毫無悔意。明天一定要上街，明天不但係反送中，仲係反對警察濫用暴力，要盧偉聰下台。」林鄭又應否下台？袁彌明說：「一定啦！完全破壞香港社會安寧。」林鄭指6.12是暴動，袁彌明相信政府不會放過曾參加示威的學生：「殺一儆百係中共同港共政權大方向，唔殺你都偷笑，點會放生。」

另外，葛民輝亦以短訊回覆：「香港人不是暴徒。」《非同凡響》導演歐文傑受訪時，對暫緩修例不收貨，更認為林鄭應就今次下台。黃秋生回應時指早就要多點時間諮詢，建議日後林鄭找其他人代為處理今次事件。不過問到秋生明天會否上街，秋生說：「我估就唔會嘞，所以我聽日都唔出街。」

民陣6.16反惡法遊行
日期：6月16日（日）
集合地點：維園草地
時間：下午2時30分集合、3時正起步
遊行路線：維園至金鐘添美道立法會

民陣6.17三罷集會
日期：6月17日（星期一）
集會地點：立法會外集會
（資料來源：民陣）

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】繼續撐蘋果
請往蘋果日報網站了解更多