大台劇《BB來了》今晚喺電視城設宴慶祝收視，主演嘅黎諾懿、李佳芯（Ali）、高海寧（高Ling）等均有出席。

其中Ali提到初接該劇時，好擔心演個經常歇斯底里嘅阿媽會被人鬧，但外界反應好，至今都倖免被鬧，反而被指其角色講出新手媽媽嘅心聲。Ali仲話撞見過車婉婉，獲對方讚好。當佢聽聞「老公」黎諾懿有意添食，Ali直言冇所謂，演到老都OK，佢又希望可以同黎諾懿及劇中囡囡一齊拍廣告賺外快。

高Ling都話有唔少觀眾都讚佢個角色，佢仲預告自己嘅角色最後都會懷孕，所以可以開拍續集，等佢變成另一個Ali。對於外界對佢同黎諾懿喺車廂激咀一幕有好大迴響，佢就話覺得好好笑。

至於黎諾懿再度明言想生豬B，最好係女，但佢話有相士指佢第二胎係仔，要到第三胎先生到女，佢話會食多啲酸性食物嚟提到生女嘅機會。

精選娛聞，喺晒《娛果》
http://fb.com/appledailyent