周日（25日）沙田有11場賽事上演，今朝早（22日）最後試跑，大圈跳馬好熱鬧。《蘋果》晨操名家積奇話有三匹勇馬，好值得大家留意。

大摩馬房「美麗傳承」落1800米草地跳兩段，戴眼罩，由騎師潘頓出試，這一課馬匹大步均速完成，身形壯碩走勢硬朗，本身埋門試大閘輕勝，狀態無唔妥。

告東尼馬房「巴基之星」蔡明紹策騎往大圈跑道跳兩段，馬匹戴眼罩及頭罩，騎者小心翼翼拖實，受操控唔急唔搶口，直路稍加快，步幅開揚有勁，經悉心操練已回勇。

羅富全（外號新人王）馬房「遨遊神駒」助手大圈跳兩段，慢開直路稍加快，灑開大步檻過，走勢上力，勤操馬身收好，本身試閘表現有前有後，初次出賽已具備爭勝水準，周日此駒會配上莫雷拉執韁。