劉德華同梁詠琪主演經典賀歲片《嚦咕嚦咕新年財》，入面有句對白「人品好，自然牌品好」，平日予人敦厚印象嘅音樂才子林一峰，日前訪問自爆愛攻打四方城。

林一峰仲搞笑呼籲三缺一可以搵佢。「我只可以打廣東牌，台灣牌太過闔家歡，世上所有人嬴，就大家發財。我覺得廣東牌衞衞生生，大家happy，有實際成功感。我啲麻雀腳冇圈中人，大家作息時間好唔同。」一峰話至friend嘅趙學而又唔打牌，佢打牌至在享受娛樂過程，「衞生麻雀，最緊要嬴咗友誼，大家嬴咗自動自覺請食飯，食得好開心，最長打十二圈，好快打完。」

麻雀枱上嘅一峰到底係點？佢自己形容：「我一定勁造牌，你睇我創作就知啦 ，review到我人生。我唔鍾意食三番，一做就做大佢。我哋好衛生，最開心一次打完八圈，睇到籌碼係零，冇嬴冇輸。唔係賭錢，係運用個腦，一心幾用，要計數，同時睇到對手牌品，我絕對好牌品，係好嘅腳。我打好細，大家三缺一，可嘗試搵我。」

一峰閒時愛打牌，工作卻愛打稿，佢日內會推出第8本新作《歌裏人》，當紙媒畀受淘汰，佢卻堅持撐住，以文會友，每位創作人都有唔同創作小秘密，一峰都唔例外：「過去15年，由第一本《音樂·旅·情》到呢本《歌裏人》，背後理念都一致，我創作無論音樂、文字，我都好鍾意理解文字背後，我嘅小秘訣係積沙成塔，寫一本書好似好大工程，大project可以分好多細project。

「我習慣寫嘢要一杯咖啡，咖啡因係我嘅朋友，雖然創作唔需要好多身外物，但咖啡因刺激絕對幫到手，創作最多會喺交通工具上。我平時朝早起身飲杯咖啡，我會畀個腦係咁唔完整寫少少，跟住利用喺交通工具上時間再整理自己創作。」一峰話中學七年，每日由大埔坐車往返慈雲山，車程每日3小時，每周返學就至少15粒鐘，佢話：「呢段時間練習咗冇暈浪，我會溫書、做功課。」佢養成坐車、坐船、坐飛機都爭取時間「開工」，點解唔閉目養神？佢話：「休息留番喺夜晚，留番喺睡房，我間房真係得張床，冇電子產品，即使手機叉電都擺好遠，瞓覺時謝絕聯絡。12點瞓到第二朝8點，除非打麻雀，我先會有電話。」

出書同出碟，而家面對大潮流係好難搵食，一峰就話出書好賣過出碟，不過佢從唔擔心搵唔到食：「創作係好得意，只要心念正確，budget就會嚟搵你，我好勤力。我會擁抱新科技，只係擔心時間唔夠用。」一峰希望即使紙媒要被淘汰，但大家都唔好玩山頭文化，佢話：「邊個行業都好，唔好各據山頭，要將力量集埋，我由出道至而家都唔係山頭文化，雖然我間係『山寨廠』，但我成日同大家一齊玩。」

攝影：陳俊強