紐卡素領隊賓尼迪斯今季帶領球隊稱霸英冠，來季強勢重返英超，雖然早前一度有傳佢不滿球隊冇大志唔肯開水喉而威脅劈炮，但周三經過同班主艾殊利會面後已經冰釋前嫌，甚至會有1億鎊擴軍，肥賓當然急不及待物色新兵，只係勢估唔到頭兩個目標竟然係曼城兩件水貨？

據英國《每日郵報》報道，肥賓日前搵過曼城足球總監碧格列斯坦商討簽入巴西中場費蘭度法蘭斯高同法國後衛文加拉的可能。其實得罪講句，兩位球員喺哥迪奧拿眼中都係多餘，其中費蘭度今季喺英超只係上陣12次，文加拉更借咗去華倫西亞，但交易障礙相信係曼城使咗大約5,400萬鎊簽佢哋兩位，實在冇可能賤賣太多，到底肥賓最終係精明眼定大水魚，就要拭目以待啦。