分析師Eric想估計豪宅租金走勢，除咗搜集地產數據之外，重諗到一個調查方法，就係問啲外資大行有冇炒外籍僱員魷魚。佢嘅論點就係：（一）外籍僱員（expatriate）佔據高位，房屋津貼多，租得起豪宅；（二）呢類人嘅數目減少，豪宅需求會減少。點解佢有此靈感呢，原來美國啲大行JP摩根、瑞士信貸第一波士頓都會炒人，前者更可能會炒百分之十五嘅M&A（收購合併）人員，後者要炒三百個MD之中嘅五十個。喺三月二十日，高盛宣布由去年十二月到二月，已經削減咗五百四十一個職位。

既然紐約方面如此，香港嘅分行點都會有啲跟風動作啩，所以Eric就周圍去問：「你間行會炒幾多人，幾多個離開香港？」唔係好多人肯答，但碰巧竟然有獵頭族打電話問佢哋要唔要聘請分析師、賓架，並且話畀佢聽，一啲素來高竇嘅expat都可以available。於是Eric就間接知道市場唔好景，月租七萬元以上嘅豪宅，後市承接力唔會幾好。
但大行始終要有人做嘢嘅，送走expat之後，遲啲就會換入一批TCN（ThirdCountryNational）（即係星加坡人、韓國人、大陸人到香港，或香港人去星加坡工作），TCN會租番三至五萬嘅樓，唔會住啲十零萬嘅屋。Eric因此得到一啲初步結論，高級豪宅，暫不睇好，除非「北水南調」！