金屬有價，唔少不法分子偷鐵、偷銅線變賣，但估唔到鋁梯、手推車都唔放過，偷完仲即刻轉手賣畀屋邨清潔阿姐，令阿姐無啦啦變咗接贓。一位工程人員上周四(29日)，喺葵盛西邨工作，但只係停低部貨車1個鐘，返轉頭已經發現原本放喺車尾嘅鋁梯、手推車不翼而飛，真係嬲爆！

由貨車嘅車cam拍攝片段見到，貨車停低時，兩名分別着牛仔褸同灰藍色外套嘅中年男子途經眼望望，之後喺附近徘徊咗一陣，似係留意有冇人經過，確定附近冇人之後，兩個人即刻由車尾位置行近，見佢哋踢住拖，一身街坊裝，似乎係附近嘅居民。牛仔褸阿叔一馬當先行埋去，一手擸起把鋁梯，之後兩人合力將佢拉出車外，片段清楚見到，牛仔褸阿叔身型瘦削，面都凹埋，而另一位阿叔，竟然喺20℃之下着羽絨，究竟佢兩位喺咩時空走出嚟嘅呢？

擸完梯都仲未夠，牛仔褸阿叔抬走埋部手推車先走人，滿載而歸嘅兩個人，分工合作咁一人搬一樣，向邨內方向離去。

車主朋友鄧先生話，朋友係工程公司判頭，當時上晝9點半喺葵盛西邨泊低架貨車，去到旁邊嘅1座樓下嘅泵房工作，點知大約1個鐘之後返轉頭，發現車上嘅工具不翼而飛，事後拎住條片問邨內保安員，對方一眼就認出佢哋，指佢哋係活躍區內，懷疑染有不良嚐好，事後仲將賊贓以超低價200蚊左右賣咗畀清潔阿姐，但因為朋友唔想阿姐因為接贓而畀人拉，所以最終冇報警，「真係好離譜，光天化日下都咁樣做！」雖然朋友唔想搞大件事，但鄧先生睇唔過眼，所以將條片公開。

葵盛西邨區議員劉美璐指，今年8月至10月，邨內先後發生3宗儲物室爆竊案，警方最近拘捕一名男子，但無收到市民其他爆竊投訴，劉美璐表示，會向警方反映事件，亦呼籲邨民唔好貪便宜而接收來歷不明物品，以防犯下接贓罪。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568