陳國邦、RubberBand嘅6號、陳漢娜、徐肇平同吳婉儀等，今日去到牛頭角為ViuTV劇集《身後事務所》出席開鏡，作為劇中比較資深嘅演員之一嘅陳國邦表示，劇集已經開拍咗一段時間，拍開無線劇集嘅佢，被問到同ViuTV拍劇有咩分別？佢話：「其實冇咩分別，每日都係拍十幾個鐘，我今日都06開到20，分別就係ViuTV全部外景，無綫就會廠接外景接返廠鏡景。」

問到國邦酬勞係咪加咗好多？佢話：「係加咗少少嘅，但係就唔係好多，始終係本地製作，唔會話好似大陸劇集咁有幾倍酬勞。」咁擔唔擔心幫ViuTV拍完劇後影響同無綫嘅關係？佢話：「其實都唔關事，如果我要擔心當初就唔會離開無綫，老實講無綫對陳國邦算唔錯，我當年出咗封信話希望離開嘅時候，佢哋已經即刻接洽我搵我拍《八時入席》。」陳國邦又舉例好多一線嘅演員，例如張衛健咁都曾經喺外面做過好多工作再返嚟無綫拍劇。

另外，新人陳漢娜喺劇中，就飾演一名女同性戀者，仲會獻出螢幕初吻，佢話：「其實我係第一次喺鏡頭前錫錫，所以我都唔知同錫男仔同女仔有咩分別。」佢話自己身邊都有唔少同性朋友，喺拍攝前都特登向佢哋取經以便投入角色。