娥特喺2019年第一次出席行政會議前見記者，一開波乜都唔講住，無啦啦主動講起話要改善吓傳媒採訪安排，仲指明係因應前排土地供應專責小組主席黃遠輝公佈小組報告，同埋中環灣仔繞道啟用前嘅參觀而來，唔少人奇怪為乜林鄭會拎呢兩單嘢講？有政界中人就猜測，背後另有原因，唔係淨係覺得影響傳媒關係咁簡單。

娥特噚日一見記者，佢就主動講起，話佢留意到最近有兩單有關傳媒採訪嘅事件令到大家有啲關注，一個係早排土地供應專責小組主席黃遠輝公佈報告嘅安排；另一單就係即將開通嘅中環灣仔繞道畀傳媒採訪嘅安排，娥特話佢都覺得以上咁嘅安排都有改善空間，所以要求咗各政策局將來要講重要嘢嗰陣主動啲同埋積極啲。

事件降級唔上身

其實政府俾傳媒投訴採訪安排差唔係第一次，為乜娥特要拎呢兩單出嚟講？有政界中人猜測，之前外界已經批評娥特將土地供應專責小組未用完已即棄，主席黃遠輝仲要「罰企」一個鐘公佈報告，自然令人聯想到政府將黃遠輝當「周永新第二」，唔聽話就還以顏色。

至於中環灣仔繞道嘅傳媒採訪安排方面，有傳媒曾經質疑政府唔方便傳媒採訪，係因為怕隧道入面啲甩漏位會畀傳媒睇到，呢兩種分析雖然幾陰謀論，但都會影響娥特管治威信。

政界中人話，𠵱家娥特主動將兩件事講成係採訪安排唔係幾好，有改善空間，成件事就降級為一般政府做嘢欠妥當，自然更加唔關娥特事，亦唔係有乜陰謀存在，所以該政界中人認為娥特真正目的唔係認對記者採訪安排欠妥，而係做政治拆彈。

李八方