民建聯蔣麗芸二○一二年殺入立法會後,憑住真性情下嘅獅吼功多咗個外號叫「元秋」,知名度激增。但元秋除咗獅吼功了得,原來都唱得兩嘴,而且嗰把低沉嘅聲線,聽起上嚟幾似百變歌后梅艷芳,仲聽到佢老公梁海明都如癡如醉,唔知細妹蔣麗萍有冇過番幾招唱歌秘技畀家姐?
話說元秋噚日約埋傳媒喺佢西九嘅家、千四呎嘅漾日居豪宅搞新年團拜,二○一三年用二千幾萬買呢個單位嘅元秋,話想買埋樓下單位㗎,可惜業主唔肯賣。新年送大禮,元秋即席獻唱無綫經典劇集《香城浪子》主題曲、梅艷芳唱嘅《心債》:「重重心中癡債 原是欠下你一世 無限無盡愛在我心底……」揸起支咪嘅元秋非常投入,唱到瞇埋晒眼,老公梁海明則全程坐喺窗台後面默默支持,可能係畀元秋嗰份歌聲中的愛意感動緊。