選舉期近，親中勢力針對民主派候選人嘅暴力行為升級。早前第一階段，就係潑屎，現時鄭家富喺厚德邨嘅辦事處，已遭到暴徒擊碎玻璃，遲啲會唔會出刀出棍，就重未知。
劉慧卿去信保安局局長李少光同李一哥，嚴正要求維持維園論壇嘅穩定。卿姐話，佢最近出席論壇，頻頻遭到親中嘅維園惡伯暴力攻擊，用枴杖雨遮勁扑車身，粗言穢語兼滿嘴生殖器官、喧嘩暴叫，更不在話下。
維園惡伯長期由本地親中勢力撐腰，有官方背景，呢一樣係人都知。佢哋以前係工人，絕大多數喺一九六七年參加過赤色暴動，顛覆政府，放炸彈殺害平民。後來因種種原因，未得到由毛頭江青至胡溫政府嘅妥善照顧，又因教育水準太低，平時冇精神出路，惟有潛伏喺維園每星期一鑊作出粗暴嘅情緒發洩。
七一大遊行，維園呢班超齡土共，因畏於正義力量，作鳥獸散，平時就坐喺長櫈，到咗維園論壇嘅周日，就係佢哋報效祖國嘅時刻。警方當然知碇，長期縱容呢班赤貧愛國暴徒，笑笑口咁袖手旁觀，即是間接鼓勵暴力。