當年今日
關於我們

地產多聲道:中原聚餐出動內地13市

蘋果日報 2002/01/22 00:00


中原地產聽日舉行周年聚餐,地點喺灣仔會展新翼。中記每年都會搞搞新意思,聽講今年就特別預咗13席嚟招待發展商,每席以內地一個大城市為名,好似北京、上海、廣州同深圳咁,全部都係中原喺內地設有分行嘅城市。不過計落𠵱家中原喺內地只有11間分行,點解會出咗13席呢?原來佢哋將會喺另外兩個城市設立據點,即係瀋陽同成都。中記友好重通知蘭西記得出席,因為實有新聞採訪。
發展商近期繼續促銷樓盤,開記者會係其中一個方法。好似長實(001)今日就公布長沙灣泓景臺嘅公開發售日期同創新付款辦法。新地(016)亦安排傳媒參觀西半山寶翠園8座示範單位,到時話唔定會講吓個盤嘅價錢㖭。
蘭西