賴：賴維銘
記：記者吳文輝

記：今期（12日）跑沙田泥地夜賽，其實要知一匹馬識唔識跑泥地，甚至叻唔叻，好多時都可以喺試閘睇到。
不過第三場五班1800米泥地賽嘅「勇福星」，上季尾贏過泥地一哩，今季泥地一哩亦曾經上過名，但最近一課泥閘，竟然輸成20.5馬位，你可唔可以解讀吓呢個情況？

賴：其實每次試閘同真正賽事一樣，練馬師都會向騎師發出策騎指示，有時係想認真考驗馬匹，亦有時會叫騎師唔好畀壓力匹馬，輕輕鬆鬆完成試閘，不過亦唔會輸20個馬位咁誇張。
「勇福星」當日於濕慢泥地試閘，由於早段輕鬆居後，有機會受到前面馬匹踢起的泥頭影響而輸咁遠，實屬情有可原，不能作準。
「勇福星」今季跑得少，不過埋門操練認真，健康應無問題，狀態有作戰水準，今場形勢有利，相信係爭勝分子。

記：其實試閘輸咁遠嘅又何止「勇福星」，第七場二班1200米泥地賽嘅「精益求精」，上星期潘頓試閘都輸17.5馬位，話時話呢匹馬你曾經操過，對佢今次轉嚟跑泥地，有乜睇法？

賴：「精益求精」前年抵港不久已經由我試過一課草閘，當時畀到我嘅感覺非常好，估計至少有二班實力，事後亦證明自己眼光冇錯，現時已升至92分。
睇「精益求精」連場前列而回，相信有望進一步突破，賽前試泥閘潘頓無畀馬匹任何壓力，沿途在外叠順走，馬匹出步爽朗，輸幾遠都唔係問題。
季初牠跑過泥賽表現唔差，四叠望空下得第五輸唔遠，相信有能力應付。不過無可否認今場對手相當強，睇睇潘頓如何發揮。

記：講完試閘輸得遠嘅馬，有邊匹試得好嘅馬，會叫讀者朋友留意？

賴：第八場三班泥地1650米，「黃金甲」試閘自己搶住走，孭住梁家俊返嚟贏六個馬位，擺明好fit，相信今場有機會開齋。

-----------------------------
【新聞有價】6月17日起 繼續撐蘋果
http://bit.ly/2IJ24ZR