大埔廣福邨居民今年聖誕節前夕收到一份驚喜，星期日冬至當晚，廣義樓多層掛上閃爍燈飾，橫跨整個四方形天井，吸引唔少人打卡，連其他座數嘅街坊紛紛話羨慕，問「幾時到我座樓？」原來係候任區議員連桷璋聯同50、60位相熟街坊同宏福區候任區議員姚鈞豪一齊製作，與民同樂背後，其實仲想帶出社區議題。

新丁連桷璋動員

連桷璋之前係廣告人，區選前憑設計精美嘅文宣突圍而出，估唔到聖誕活動一樣計仔多多。佢話冇諗過居民反應會咁熱烈，因為一直覺得公屋井字形天井結構好靚，所以掛聖誕燈飾嘅話絕對不作他選，至於點解係廣義樓？佢話因為業委會主席比較傾到偈。

大部份燈飾都係佢同街坊回收所得，亦有部份係新買，燈飾全長差唔多500米，橫跨多層樓，整嗰陣好多街坊走出嚟話想幫手，而燈飾駁嘅電，都係喺居民屋企拉個拖板出嚟用，有街坊同佢講天井位不嬲好悶，從未咁熱鬧，連桷璋就話好認同有人留言話「物資係好平，不嬲最貴係人工」，呢啲唔係外判嚿錢出嚟就做到。