【等好消息】楊卓娜唔知楊怡造人大計：我都冇問
蘋果日報 2019/09/24 23:28
楊卓娜張松枝
楊卓娜、張松枝、陸駿光、吳嘉龍等今晚在尖沙嘴出席電影《星際任務》首映，撇低老公和女兒的楊卓娜，她笑言要看男主角畢彼特（Brad Pitt），「我係佢fans，同埋我都鍾意睇呢類型嘅戲。」對於有報道指妹妹楊怡和羅仲謙造人成功，楊卓娜十分口密，她笑說：「你哋冇打電話去問？我唔關心呢啲嘢，我比較關心自己個肚有冇肚腩，你哋應該仲多料過我，因為我都冇問，如果你哋有消息就話我知啦！」談到楊媽媽10月生日，楊卓娜指媽媽向來食得清淡，以往生日都情願自己下廚，但由於今年是媽媽的70歲大壽，所以都會外出食飯慶祝。
提到有指以警察為題材的無綫新劇《伙記辦大事》，疑避開近期逆權運動警察濫暴風波，早前沒有安排記者採訪，「靜悄悄」舉行試造型，有份演出該劇的楊卓娜說：「我又冇問呢個問題，其實遲早都會試造型，因為當日全部都冇着制服，因為係初次試造型，分分鐘仲有造型仲要改，所以我諗公司會另有安排。」楊卓娜表示在劇中與歐陽震華有很多對手戲，但不是飾演警察，她說：「好遺憾，我好想試下，我從來未試過着制服嘅角色，希望以後有機會。」會否擔心民怨？她表示：「我覺得唔關事，每個人都行喺自己嘅生活軌道上，最緊要愛護自己身邊嘅人，為我哋社會付出一分力，其實冇話關任何一啲敏感話題，大家應該好有愛，唔好將唔開心嘅嘢掛喺嘴邊，咁係人同人之間最好嘅相處方法。」
張松枝快將接拍一套ViuTV劇，飾演一個帶女洪郎，他笑說：「講我個女出世嘅時候，媽咪就死咗，我聽到都覺得好慘，我又冇感情線，得親情線，個女就有幾個男朋友。」已為人父的他，可將經驗套在角色上。
採訪：黃曉妍
攝影：陳俊強
攝影：陳俊強
楊卓娜笑言關心自己有冇肚腩多過關心妹妹個肚有冇餡。
楊卓娜有份參演警察題材新劇《伙記辦大事》，稱不擔心民憤。
張松枝快將接拍一套ViuTV劇，飾演一個帶女洪郎。