阿仙奴今季英超失落前四，不過都拎番個英足盃安慰獎，球員心情都唔算太難過；好似瑞士中場格列沙加，都算係情場得意，佢就喺個人IG上載自己向女友Leonita Lekaj單膝下跪求婚相，女友開心到掩面，當然係Say yes啦，不過沙加就冇透露幾時正式結婚。

格列沙加今季轉投阿仙奴，開到就唔算好好，好彩之後領隊雲格改踢3-4-3陣式，沙加發揮多啲，表現先有明顯改善。沙加求婚成功，不單喺IG留言「佢答應」，仲好有文采咁講：「A golden Ball is a miracle, a golden wife is a paradise!」（金球係奇蹟，金妻係天堂）。希望沙加娶埋老婆後，安安定定幫阿仙奴爭取佳績啦。