「股壇開心果」藺常念年近70，越來越好火，不時喺facebook爆seed，繼上月立法會選舉前指民建聯候選人全部似騙子，又網上留言形容《海闊天空》係「香港人自己的國歌」後，藺Sir噚日喺fb狠批「翠如BB股」聯旺（8217）。
藝人黃翠如爸爸黃永華做大股東嘅建築股聯旺，上市約半年，股價爆升逾60倍，非常誇張，噚日又無端端升40%，公司市值逾200億元，但全日成交額只得17萬元。

指有人將股票完全操控

藺Sir忍唔住po千字文，指聯旺股價火箭式上升，反映市場監管有漏洞，有人將股票圍起來完全操控。
華華同藺Sir傾過，佢指建築股容易喺盈利上符合創業板上市要求，要賣殼甩手亦唔難。佢形容呢類股份「give Hong Kong a black eye」（敗壞香港名聲），直指聯旺「價值係零」，係垃圾公司。唔止鬧爆妖股同將股價舞高弄低嘅莊家，藺Sir亦規勸投資者「炒呢啲股係不道德行為」。
藺Sir繼而炮轟港交所（388）未有修例，取締創仔上市全配售做法，認為應強迫創業板與主板一樣，設有公開發售部份。出名敢言嘅藺Sir其實一直非常關心金融界監管，舊年底曾發文鬧港交所容許私有化咗嘅公司將舊業務重新上市，市場真係好需要呢把聲音㗎。

李華華
mailto:[email protected]