美國女明星美亞花露（MiaFarrow）噚日抵港，佢係美國人又世界知名，特區政府投鼠忌器，擾攘一輪後始終要畀佢入境，美亞花露喺機場時發生咗一段小插曲，幾乎擾亂今日奧運火炬傳送過程。
美亞花露落機後，同助手行經入境大堂之際，劉華竟然迎面而來。劉華前晚喺北京奧運倒數100日晚會表演，噚日返港準備今日傳聖火。美亞花露唔識劉華，劉華亦唔知道擦身而過嘅係大明星，有記者嗌停劉華，「華仔，同MiaFarrow影張相吖！」

來港演講旅遊

劉華聽到後一頭霧水，好似唔知美亞花露係乜水，記者再話畀佢知，美亞花露嚟香港演講，佢開始有啲反應，呢個時候，有記者話美亞花露今次係嚟反對北京奧運。一聽到有人反對奧運，劉華面色即時一沉，之後唔係幾客氣咁話：「咁就唔好（影相）嘞！」隨即同助手急急腳跟住地勤人員經特別通道離開。
八方相信美亞花露唔知劉華係千挑萬選嘅奧運火炬手之一，否則可能即時拉住佢，游說佢加入杯葛北京奧運行列，利用明星知名度影響力，協助改善蘇丹達爾富爾人權問題。劉華力撐奧運，又係第四棒火炬手，如果兩人合照，北京奧組委都幾尷尬，劉華即時喺火炬手名單上消失都唔奇。
美亞花露同八方講，今次係首次嚟香港，除咗演講，最希望好似一般遊客咁去上海灘shopping，搭吓天星小輪，行吓油麻地玉石市場，去荷李活道買古董。美亞花露過門都係客，劉華幫旅發局宣傳好客之道，冇理由拒絕合照，今時今日咁嘅態度，係未夠㗎！

mailto:[email protected]