當年今日

地產多聲道:恆基商場有星到兼送禮

蘋果日報 2003/05/07 00:00


過幾日就係母親節,又係發展商為商場搞活動嘅重要檔期,有嘢送同有明星睇就梗係最煞食啦,恒基旗下嘅將軍澳新都城中心商場就全部都有齊晒嘞。
新都城中心商場喺今個禮拜日,會搞「新都城中心Shine半熟男孩」簽名演唱會,人氣組合Shine會唱歌同做抗炎運動示範。買嘢滿三百蚊,可免費換到Shine嘅最新大碟同恒基送出「抗炎套裝」。
馬鞍山新港城中心商場,就喺本月18號搞「馬浚偉新帝女花情牽新港城」簽名演唱會,重有唱片換領,25號就係「六樓后座眾星匯聚新港城」,有戲票換領。
另外,九龍建業嘅太子始創中心,喺母親節就同五間食肆聯手,推出晚市優惠,重有兩個鐘免費泊車,即日起消費滿三百蚊(一張發票計)就送五十蚊始創中心優惠券。

明報中心貶八成
中原工商部營業董事郭楚華講,柴灣明報工業中心,A座9樓約一萬四千呎樓面,啱啱由喺油塘區開廠嘅製衣商承咗,450萬,圍起每呎317蚊。比原業主91年買入價每呎1770蚊,足足唔見咗八成二。
郭楚華指出,原業主係台資電視台,早前將持有嘅10樓全層,同2樓部份樓面,以呎價367蚊賣咗。
將中獎金美記火速奪
發展商近排興搞代理銷售比賽,用現金獎賞表現好嘅代理,啲貨又可以賣得快啲,大家都有着數。由四間發展商起嘅將軍澳中心,上個禮拜至宣布舉行五月銷售獎比賽,邊間代理最快做到二十單,就獎二十萬,點知美聯唔使一個禮拜,就達目標,發展商今日頒獎。呢類比賽咁見效,搞多啲個市都旺啲啦!

工商租務市場環境唔錯
喺非典型肺炎打擊之下,好多人都以為工商物業租務市場好唔掂,其實陸續都出現唔少大手租務。美聯物業高級營業經理伍錦倫話,好似葵芳新都會廣場,最近就有兩層租出,夾埋都近三萬一呎,呎租十蚊,租客係兩家貿易公司。葵涌萬泰中心十八樓全層,近萬六呎,月租約十三萬,呎租八個二。
至於工業樓就有荃灣德士古道工業中心,萬四呎地廠,月租十萬,呎租七蚊。屯門百利中心二樓近兩萬八呎,月租就平啲,五萬四蚊,呎租兩蚊。
廣州新盤好賣多得肺炎
近排內地非典型肺炎疫情愈嚟愈嚴重,啲人唔敢外遊,好多去咗睇樓,結果新盤銷情好咗。廣州盈昇房地產副總經理鍾嘉年話,旗下翠馨華庭(圖三)喺今個月1到4號嘅假期,總共賣咗六十五伙,成績唔錯。
聽代理置業國際話,發展商加推一站式全包付款法,幾吸引,買家喺入伙前畀萬八人民幣,就包晒首期、入伙前嘅銀行供款、買賣合約同按揭費。其他費用到8月底入伙至畀。

三幢舊樓放售由客開價
樓市進一步尋底,業主放盤,都想知道值幾多,係咪自己心目中嘅價。忠誠拍賣行最近攞到三項全幢舊樓嘅獨家代理權,全屬同一業主,由買家出價,等佢考慮賣唔賣。
三項物業都係六到八層高,樓齡四十幾年,分別係土瓜灣譚公道七十一號、上鄉道五號,同埋紅磡新柳街四號,地盤面積九百到兩千零呎。收緊嘅月租最貴都係五萬零蚊,究竟值幾多錢呢,有興趣嘅就要計吓數嘞。
蘭西發現,原來呢啲舊樓單位,每月租金大部份都係三千零到五千蚊,呎租一般六到八蚊。不過,譚公道71號7字樓,約六百四十八方呎,分為中房同後房,包差餉月租分別係六百五十同九百蚊,認真抵租。
蘭西
電郵地址:[email protected]
empty
新都城中心商場
empty
(圖三)
empty
忠誠代售嘅三幢高齡樓,圖為譚公道七十一號。