到底有錢人留啲乜嘢畀仔女最有意義呢？如果以城市電訊（1137）主席、「電訊魔童」王維基嚟講，應該係自己嘅時間同埋故事。魔童啱啱出咗本新書，叫《敢想．敢做》，裏面結集咗佢近年喺周刊專欄嘅文章，佢話寫嘢係為對寶貝仔女，因為呢十幾年來都冇乜點陪過佢哋（97年因為搞上市，miss咗個仔出世嘅珍貴一刻），所以佢好希望仔女透過自己啲文章，知道爸爸係咩人、點樣去解決困難。
點解今次處男下海咁低調？魔童話唔敢搞簽名會（終於有樣嘢佢唔敢做），係因為怕零fans好冇面。查實佢唔使驚，事關上星期幫佢出書嘅報紙，喺網站話會送10本書畀讀者，「啅」一聲就有過千個email話想要。唔知係咪大家睇到個書名，以為爆亞視大鑊？

寫緊第二本

魔童話家寫緊第二本書，仲有3個月就搞掂，內容大致係環繞佢呢十幾年嘅營商之道同心路歷程，當然，呢本都係為咗對仔女寫㗎啦！裏面唔知會唔會有啲「我在亞視的日子」或者「我與電盈的恩怨情仇」咁爆嘅內容呢？