由張東健、柳承龍主演嘅新片《七年之夜》，大前日起喺韓國公映，兩人近期忙於四出謝票答謝影迷並受訪宣傳。《七年之夜》講述柳承龍飾演嘅司機，意外誤殺咗一名女生，而飾演女生父親嘅張東健為幫女兒報仇，利用7年時間去設計復仇計劃。

張東健為咗演活失去女兒嘅父親，更刻意將髮型變為「M字額」。不過近日張東健受訪時就指佢呢個「M字額」髮型嚇親唔少人，當中包括其演員老婆高素榮及一對仔女。張東健坦言：「一開始導演建議『M字額』髮型時我都難以接受，擔心過會唔會因為同以前形象差太遠，令人無法接受。不過試造型時，工作人員反應都好好，而我又覺得多咗份新鮮感，所以就以呢個髮型演出。」

隨後張東健笑指：「剛嘗試剪成『M字額』髮型時，高素榮都嚇咗一大跳，仲叫我唔好行近佢。不過對耐咗，高素榮都讚好有魅力，仲影咗相儲存喺手機。但一次偶然一對仔女見到我呢個髮型，就問呢個係邊個，稱『好似怪物』，完全認唔出係老竇。」引起爆笑。

更多韓流，喺晒《娛果》
http://fb.com/appledailyent